له زراعت پوهنځي څخه ۸۹ تنه محصلين فارغ او د لومړي ځل لپاره په فراغتغونډه کې رسمي تحصيلي اسناد ورکړل شول
سيد جمال الدين افغاني پوهنتون د زراعت پوهنځي له درېوو څانگو څخه د لېسانس په کچه تر لوړو زدهکړو وروسته په ديارلسمه دوره کې(۸۹) تنه محصلين فارغ او ټولنې ته د خدمت په موخه وړاندې شول.
په همدې موخه جوړه شوې غونډه چې د پوهنتون په تالار کې رابلل شوې وه، د پوهنتون عمومي رئيس الحاج مولوي عبدالواسع منصور، د پوهنځيو رئيسانو، کونړ د ځېنيو ولايتي ادارو مسؤلينو او مېلمنو، د پوهنتون استادانو، اداري کارکوونکو، فارغېدونکو محصلينو او د هغوی د کورنیو غړو برخه لرله.
غونډې ته د پوهنتون عمومي رئيس په خپلو خبرو کې فارغېدونکو محصلينو ته مبارکي وويله او زياته يې کړه، خوښ او خوشحاله يم او افتخار کوم چې نن ورځ په اسلامي روحيه او د زراعت په يو ډېر مهم مسلک کې روزل شوي کادرونه د ټولنې او نظام د خدمت لپاره وړاندې کوو. نوموړي فارغانو ته په خطاب کې وويل دا چې زراعت او کرنه د يو ملک د پرمختگ لپاره مهم سبب دی نو د ولس هوساينې او ځانبسياينې لپاره په پوره اخلاص، کلک هوډ او قوي عزم سره خدمت وکړئ.
غونډې ته د عبدالله بن عباس ؓ ديني جامعې رئیس شيخ عبدالمالک نيازي، کونړ ولایت د جهادي مدرسې مهتمم شيخ عبدالقهار صديقي، د زراعت پوهنځي رئيس پوهندوی محمد حسن محمدي او نورو ويناوالو په خپلو خبرو کې فارغانو ته مبارکي وويله او هغوی يې لا نورو لوړو زدهکړو ته وهڅول. نوموړو همداراز هغوی ته له فراغت وروسته د مسؤليتونو په هکله لازمې توصيې وکړې.
هېره دې نه وي چې په دې فراغتغونډه کې فارغانو ته د فراغت رسمي تحصيلي اسناد(ديپلوم او ترانسکرېپت) ورکړل شول، چې د پوهنتون رهبرۍ له لوري د ستاينليکونو په ورکړې سره، د دې نوښتيزې چارې د ترسره کوونکو مسؤلينو قدراني هم وشوه.
د يادونې وړ ده چې د سيد جمال الدين افغاني پوهنتون په سږ ۱۴۰۵ تحصيلي کال کې د پنځهگونو پوهنځيو له ۱۶ بېلابېلو څانگو څخه ۵۸۴ تنه محصلين فارغ او ټولنې ته د خدمت موخه وړاندې کړل، چې د فراغت په بېلابېلو غونډو کې رسمي تحصيلي اسناد ورکړل شول.
