سيد جمال الدين افغاني پوهنتون د علمي څېړنو او مجلې مرستيال معرفي شو
پوهنتون د علمي څېړنو او مجلې مرستيال پوهندوی دوکتور سيد اصغر هاشمي د لوړو زده کړو وزارت د لزوم دید او د ریاست الوزرا عالي مقام د حکم پر بنسټ د ياد معاونيت لپاره ټاکل شوی؛ چې نن ورځ د پوهنتون رييس پوهنمل محب الله محب له لوري د پوهنتون منسوبيو ته ور وپېژندل شو.
په دې اړه جوړې شوې غونډه کې د پوهنتون مرستيالانو، د پوهنځيو رييسانو، استادانو او اداري کارکوونکو برخه لرله.
غونډې ته د پوهنتون رييس پوهنمل محب الله محب په خپلو خبرو کې نوي ټاکل شوي مرستيال ته د بري هيله وکړه او زياته يې کړه چې دنده امتیاز نه بلکې، یو مسؤلیت دی او هر مسؤلیت چې چا ته سپارل کېږي بايد په ښه ډول يې ترسره کړي، نوموړي همداراز د پوهنتون ټولو منسوبينو ته سپارښتنه وکړه چې د پوهنتون موخو ته د رسېدو په پار له یو او بل سره په همکارۍ او مشوره کار وکړي تر څو ټولې چارې پر وخت او په ښه ډول ترسره شي.
پوهنتون د علمي څېړنو او مجلې معاونيت لپاره نوي ټاکل شوي معاون پوهندوی دوکتور سيد اصغر هاشمي هم د خپلو راتلونکو پلانونو په اړه خبرې وکړې او د مقاماتو له باور او اعتماد څخه يې مننه او د چارو د ښه ترسره کولو ژمنه يې وکړه.
د يادونې وړ ده چې د نظام مشرتابه او لوړو زده کړو وزارت د يو کم ساري گام په ترڅ کې د ۱۴۰۲ کال په تشکيل کې د ۲۵ پوهنتونونو لپاره د علمي څېړنو او مجلې نوي معاونيتونه ايجاد او منظور کړل چې تر دې وړاندې په افغانستان کې هېڅ پوهنتون دا معاونيت نه درلود.
