د درسي، څېړنيزو او مطالعاتي اثارو د ارزونې لارښود د تشرېح په تړاو يو ورځنی سېمينار داير شو
د پوهاوي دغه سېمينار چې د سيد جمال الدين افغاني پوهنتون پوهنتون د علمي معاونيت له لوري د معلوماتي ټکنالوژۍ په مرکز کې جوړ شوی ؤ، د پوهنتون مشرتابه پلاوي، د پوهنځيو رئيسانو، د څانگو آمرينو او استادانو په کې برخه لرله. د سېمينار په پيل کې د پوهنتون عمومي رئيس الحاج مولوي عبدالواسع منصور په خپله وينا کې د ښه راغلاست ترڅنگ، د علمي کادر غړو لپاره ياد علمي او مشورتي سېمينار مهم وباله او هغوی يې مخاطب کړل چې په اړوندو برخو کې يې په جدي ډول تطبيق کړي. نوموړي په خپلو خبرو کې د تېر سمستر بريالي پای ته رسېدو له کبله له اړوندو مسؤلينو مننه وکړه او هغوی ته يې لارښوونه وکړه چې له شته فرصتونو او امکاناتو څخه اعظمي استفاده وکړي.
ورپسې د پوهنتون علمي مرستيال قاضي عبدالهادي فضلي د موضوع په تړاو چمتو کړی پرېزېنټېشن وړاندې کړ او په لارښود کې يې ټول موجود موضوعات وار په وار تشرېح کړل او په پای کې يې د گډونوالو پوښتنو ته ځوابونه ورکړل. د يادونې وړه چې د سېمينار په پای کې د پوهنتون عمومي رئيس له لوري د تدارکاتو آمر او د مالي او اداري معاونيت سرپرست محمد موسی محمدي د ښو خدمتونو له کبله د ستاينليک په ورکولو سره وستايل شو. ياد سېمينار چې د قرانکريم د څو مبارکو آياتونو پر تلاوت پيل شوی ؤ، په دُعايه کلماتو سره پای ته ورسېد.
